【方以文 一個人寫光影】林珍真 舞台劇《#我們很快樂》
文章日期：2026年9月14日
原文網址：
林珍真自編自導自演嘅《我們很快樂》做足13年，11月中嚟到第十次公演，講到明係最後一次，要同呢個橫跨自己29歲至42歲嘅獨腳戲作品告別。
「13年間我嘅轉變都幾大，由中環返工嘅靚靚奢侈品牌公關變成劇場freelancer同埋兩孩之母。雖然我已經唔係OL，但仍然留意到身邊嘅朋友跟足社會步驟，戴上自己都討厭嘅面具去證明自己活得好好，內心卻無人承接脆弱。呢幾年我開始明白『追求快樂』只是表面，係短暫嘅。真正嘅快樂，係當你明白世界永遠都唔完美，有勇氣去直視成長嘅痛楚孤獨，同天天苛求完美嘅內心達成和解。」
第三次公演時，男朋友喺台下求婚；到兩年前第九度公演時，女兒上台參與演出。《我們很快樂》由最初想氹身邊朋友高興，變成林珍真送俾自己兩個小朋友嘅情書，同作品已經「骨肉相連」。
「《我們很快樂》重疊咗我人生所有最重要嘅時刻同階段，令我驚覺自己真係長大。踏入 40 歲後，終於輪到自己經歷『中年危機』。睇住呢幾年香港同大環境變化，內心成日有種揮之不去嘅孤獨與迷惘。然後驚覺自己因為怕離開呢個13年嘅安全網而一直唔敢放手。直到我開始明白所謂『中年危機』可以係一個俾自己再去成長嘅機會，我就有種強烈嘅感覺要再踏出comfort zone去探險。」
32歲裸辭全力投身戲劇界，一步步努力，喺2025年憑自導自演獨腳翻譯劇《每一件美好的事》得到當年「IATC (HK) 劇評人獎」年度演員獎。42歲再鼓起勇氣，將成長代表作封箱完結。「想睇吓我未來十年仲有啲咩可能性。」
永久封存嘅，仲有自己喺舞台上嘅投射化身、《我們很快樂》的主角Noel。十次踏上舞台，由最初努力尋找快樂、飾演快樂，到最終回撕破「努力去快樂」嘅假象，直視孤獨與空虛。林珍真嘅人生領悟，由Noel喺台上面傳遞發放。
林珍真對於Noel千頭萬緒。
「Noel，你終於自由了。」
留言